Giro LA PARENZANA

Tuto comincia una matina de primavera, sarà sta magio, quando Coco, se no sbaglio davanti una bona radler là de Danilo, al termine de un gireto “carsico” el fa:

Ciò muli, sarìa bel far la parenzana…..Orca….bel sì…ma la xe longa ! Furio, Coco per i amici, co se meti in testa una roba nol mola. “Bisogna alenarse !!!” Machè longa dei, sarà 70 km massimo.

No, no el mio amico Attilio ( futuro capogita ) la ga fata za do volte e xe 120 e roti km !!  Ma noooo……….  E inveze sì. Gaveva ragion Coco.
70 km xe per strada in auto per andar al bagno. El treno fazeva un altro giro.

L’obietivo comunque resta valido e se comincia a far dele ricognizioni su vari tochi de strada, un
poco per curiosità e un poco per alenarse.

Vari grupi de “lavor” se forma in base a come se riva combinar…( xe chi lavora, chi tien i fioi, chi xe in ferie, qualchedun ga mal de schena….) .Comincia le ricerche su internet de cartine, racconti, informazioni, filmati…..Un toco ala volta se riva fina a Grisignana ciapàndola come una gita, contemplando le beleze che ne riserva sta nostra Istria.

El progeto comincia a ciapàr forma dopo feragosto. In un momento de pausa sul lavor.

“Ciò Fabio” fa Sandro..”qua el tempo passa e no se decidi niente. Te vol che butemo mi e ti zo una data vardando el turnario e vedemo se ghe va ben a tuti ?”

Ditto, fatto. Turnario ala man se decidi per venerdì 18 setembre.

Avisadi i interesadi e non, restemo in atesa de riscontri. Saremo in tanti? Saremo in pochi ?

Ve la fazo curta. Chi devi cior ore de note, chi de giorno, chi forsi sì, chi no sicuro, chi.”ma voi se fora”, aniversari, fioi con la febre, se ritrovemo in otto. Dopo una providenziale “prova su strada”, dopo più de un mese de inatività, mola anche Pino. El mal de schena se fa sentir. Restemo in sette..

El settebello,quel che resta del “mtb4beer FRIZANTEAM ciclisticisti”, xe formà da Furio ( promotor del progeto), Attilio (esperto del percorso nominado “capogita” ), Fabio che ga organizà el trasporto e el ristoro, Sandro ( porta-borracce per no esser lasà indrio ), Plinio,iriducibile freerider, freeclimber, freesurfer, freekiter nonostante el record tuttora imbattudo de infortuni, el Cata e Marino. Un istrutor de TPSS ghe vol…no se sa mai…

Ultime raccomandazioni la sera prima da parte de Fabio per whattsapp: “Muli, chi ga kune che le porti. Pol esser utile la tessera sanitaria ( speremo de no ), e sopratuto la carta de identità che no comincemo a balar el “tuca tuca” al confin e no ne tochi tornar indrio!”. Ore 6 e 45 ritrovo al park del briko. Ore 7 partenza. Bon… fata !!

El giorno dopo tutti puntuali all’ora stabilida. Bici, zaini, merende, documenti, cascheti . No manca niente. Spunta adiritura dala machina de Sandro un vecio caschetto che par un picio “bidet” dela dolomite de meterse in testa. Durèrà poco.Veloce brifing su tabella de marcia. Se pol partir. Prima sosta: Portorose…caffè. Ghe sta!

Gruppo a Sicciole

 Se passa per Siciole , se fa el giro dele saline e do de lori za manca. Marino e Sandro se ferma ala reception della SPA a cior informazioni per portar le mogli !!! Che bravi muli…

Ricompatado el gruppo se va veloci verso el confin. Marino riva far una fila de diese machine per cior fora el documento. NB: le strade iera svode….fazè voi…Comunque via lissi.

Se procedi veloci verso Salvore, svolta all’altezza de Kanegra e via verso Buie.

Foto de rito soto al cartel, picola sosta poco più avanti dela staziòn. Caldo e umido de “cagarse” che ne fa sudar de bruto. Grisignana, la nostra “cima Coppi” de giornada (300 mt slm ) ne speta. Anche una merenda e una radler fresca.
Dopo una picia galeria rivemo in vista del paese. Un vero spetacolo. 

Dita ala triestina…”un bombom”.

Se fermemo in un localìn simpatico con una bela vista sule colline istriane. Pecà la giornada sai umida e fosca. Sai meno simpatico el mulo che lavora là. Rifornimento de acqua in fontana e via in “piena” ( anche in discesa toca pedalar ) verso Livade. Sempre più spesso perdemo de vista Attilio e el Cata. Per lori gavemo un ritmo de “portar a spasso la bici.”. In gergo non ciclistico:”Come portar pissar el can”.

Sandro, Marino, Plinio e Fabio viaggia nelle retrovie e a un certo punto Plinio ziga “ MOREEE !”.

Inciodada sula giara e sosta tra i spini a ingrumar i fruti. Fabio no se acorzi e lo troveremo più in basso che el ne speta e ne fa un per de foto..

Qualche foto qua e là, dove che merita e se trovemo in piaza a Livade su un tavolin per un’altra merenda .Attilio, Cata e Furio xe za sentadi. Se fermemo una mez'ora bona. Proprio un bel posto, sotovento de un scovazòn e ogni tanto ne riva spuza de carogna. Ma no fa niente: la compagnia xe bona, metemo la musica dela Parenzana che ga trovà Fabio no se sa dove. Finalmente rivemo contatar el mato del trasporto e se metemo d’accordo per el ritorno. El ga un agriturismo che se ciama al “ Merloulivo”. Capiremo più tardi el perché del “merlo”.

Rifornimento de acqua in fontana. Boracce piene. Panza circa.

Comincemo la salita verso Montona. Bel el paese visto da sotto, ma a nisùn no ghe xe passà per la testa de andar fin su. Fin a Visinada gavemo ancora salita, morbida ma longa, de far.

Attilio e el Cata se invola a un ritmo insostenibile per i altri. Fabio e Plinio gavessi podù star con lori, ma i scegli la compagnia e i panorami .Me son dimenticà de dir fin adesso che Attilio pedalava tenindo in man la go-pro. Anche col bastòn. Fe voi...

Attilio e Cata... sempre in fuga

Se forma delle coppie durante la salita. Davanti Attilio e Cata, a distanza Fabio e Plinio, in mezzo Furio e nelle retrovie Sandro e Marino.

Fato sta che a un certo punto vedemo Furio fermo de parte del sentier. Forsi el ga trovà funghi ? Macchè.

“Cazzo muli, che mal. Go un crampo sul polpaccio!”

“Hei fermiii,” ziga Marino, e torna indrio anche Fabio e Plinio. Attilio e Cata no se vedi più.

“Smonta pian dela bici” disi Sandro, e xe tutto un dir. Con le gambe de teak che gaveva Coco in quel momento ghe ciapa un altro crampo de un’altra parte. Stretching de rito, una bevuda de acqua e Coco xe come novo.

“Go dito mi che dovevimo bever una radler a testa a Grisignana….” sostien qualchedun.” Semo scarsi de sali minerali !”

 Riprendemo la marcia verso la cima e al punto de ritrovo con i “fuggitivi”. In fuga i andava su a 25 km/h. Ciama antidoping !! Se ritrovemo a un punto de ristoro qualche chilometro prima de Visinada dove fa tappa un trenin che porta a far un giro i turisti sul vecio percorso dela ferrovia.

Attilio e Cata ga za fora le merende e qualche lattina de birra bela fresca per “gli assetati”…..lori compresi! Xe là el trenin con un pochi de turisti, (un do, tre de lori sul quintal ).

Xe un tavolo longo soto la tettoia pien de tartinete de salame, panzeta, crudo…..tipo “inaugurazion”. Un insulto per i nostri oci e stomighi.

“Signora...cossa se pol cior ?” Marino se fa portavoce. Educatissimo.

“Nooooo....xe per i turisti del trenin” fa la baba che pareva esser el boss del logo.Bon, cice ah....no ne resta che barrette e frutta secca.

Intanto che femo i scoiatoli alcolisti con nosi e pivo, sto trenin va via.Un con la fisarmonica ghe sona un motiveto.....e la cibària xe ancora là !! Mah.....che pecà ara.

“Signora ma cossa butè via sta roba ?”...Marino no mola.

Se pol cior una tartina?   No! Xe per turisti con trenin...

“Desso podè cior se volè”......SE VOLEMOOOO ? Prima una tartina ala volta, dopo le guantiere intiere sula tola, altri giri de birre e ghe gavemo netà l'orto. Anche qualche bicèr de nero ga osà qualchedun.

“Maestro, la sa “La mula de Parenzo”?

Al mulo no ghe pareva vero. El ga tacà banda e nol se fermava più. Iera anni, mi digo, che no ghe capitava de sonar con gente che cantava e conoseva la canzòn !! Sule ali dell'entusiasmo xe spuntade richieste del tipo “Mia lepa Marjana”. No ocori che zonto altro me par.

Mossi da gratitudine per la merenda “scrocada”, altri giri de birre e acquisto de “gadget” tipici del logo.

I meti dentro al recinto el mus e le cavre. I disbrata le tole e i sera i frighi.I conta i bori. Incasso raggiunto. Festa finida !!! El treno tornerà domani.

Xe ora de ripartìr anche per noi.La tabella de marcia no perdona.

La panzeta, el salame e i liquidi recuperadi, finalmente, fa el suo. Se pedala ben.

Tutto tranquillo fin la piera che segna i zento chilometri del tracciato. No...no xe sucesso niente dopo...solita foto de rito ingropai intorno al monolite.”Meteve cusì...meteve colì... “

KM 100 TPC (Trieste-Parenzo-Canfanaro: fin la, la gavesi dovudo arrivar) 

Ancora un per de selfie e semo pronti a ripartìr.

Tante ore sul sellìn se fa sentir. El cul anche !!!

Visinada ormai xe conquistada e comincia la discesa ( altra monada ) verso Parenzo. Se vedi el mar. Xe quasi fata !!!

Qua la traccia del percorso xe confusa e se ritrovemo a far i ultimi km su asfalto. Lontan se vedi un cartel........PARENZO !!!! Nianche parlar de far una foto soto el cartel. Co te ga tuto el sangue nei polpaci la lucidità mentale latita....

E proprio in ste condizioni, dopo esser sta indrio tuta la strada, Sandro,mosso da reminescenze de vecio campegiador dela zona, e con poco sangue in testa, el sfila el grupo e el se porta in testa.

“Ve porto mi !!”. Ailo qua...

Una rotonda, due, ala terza el xe in tera longo disteso. “Muli...me xe partì l'anteriore.( Troppo Guido Meda nele orece).  Un con la moto me ga taià la strada !!! Che el vadi in stram....za de su mare !!

No ghe ga credù nisun. Plinio ghe va vizin e ghe disi:”cambia quele riode dei”.

Attilio, più signor:”Bravo però...te son cascà ben !!” Eh....xe soddisfazioni no de poco...

El se ingruma più ferì nell'orgoglio che nel fisico e se prosegui attraverso Parenzo per andar a far un meritatissimo “toch”.

Trovà el posto con una doccia per resentarse se calemo in acqua. Aaaaahhh che bell !

L'acqua salada fa venir a galla le magagne. A più de qualchedun ghe brusa le culate.

Nianche el tempo de far una dorada che xe za tardi. Ma porc.....

Alo de novo tuto in furia; far la doccia, sugarse, cambiarse e rimontar sula bici. Bisogna andar al punto de ritrovo col “merlo” che ve disevo all'inizio. El ne speta in un piazal che per fortuna ga un bareto vizin. Intanto che el cariga le bici sula “prikoliza” se ciucemo una radler. La sede no perdona.

Montemo in ordine sparso in sto Land Rover passo lungo.

“Ciau, son Francesco. Se tuti ?” “Sì vai” e se parti.

El taca el stereo. Musica reggae in auto e Bob Marley sula maieta. Ara che ben ciò.....qua salta fora qualcosa de bon....

Niente !!! Un ciacolòn numero uno che ghe fa l'orecia sinistra viola a Sandro sentà davanti. Farà pandàm col ginocio e col comio dela stesa parte, combinazion...

“Muli, se volè birra, in local no gavemo....bisogna fermarse in distributor a comprar ( coi “nostri”logico...anzi,con quei de Plinio per la precision ). Comincemo ben dei......

Rivemo là, bel postisìn sto “Merlolivo”. Smontar con le zate dure xe un'impresa per metà de noi.

Fora xe un tavolo soto una pergola coverta con le canete. Se metemo là intorno. Sulla panca de legno, su quele de piera, su una brandina de teak. Se distira Fabio, el più giovine;l'unico che gavessi podù rialzare de per tera !

“Bevè qua l'aperitivo e dopo gavemo preparà dentro”.  Bon ah....spetemo.

MerloFrancesco ne ga portà i biceri ( ghe ga volù un quarto de ora) e mezo de bianco. L'acqua per far spritz gavemo messo noi, anzi Plinio. Qua xe longhi muli...

No so de chi xe la colpa, se del merlo parlante o de chi iera in cusina, ma tra el “sontuoso” aperitivo  e l'inizio dela zena xe pasada, mi digo, un'altra ora. Ma se te savevi che vegnimo.....organizite no?!!!!

Riva el magnar. Se vardemo nei oci. Pasta fata in casa, sbiribici me par,no fusi, col sugo de galina e altre bestie. Bon... per l'amor de Dio...ma i fioi dell'asilo gavesi domandà: “Maestra, posso ancora ?“ Te se imagini sette de lori che ga pedalà zentoventi chilometri soto el sol ? Quel rebechìn al ristoro de Visinada ghe ga salvà la vita !!! Spetemo el secondo. Ghe vol un poco che digerimo....logico !!!

Cata comincia a caminar su e zo col cell in man. El calcolava de esser a casa per le otto, otto e meza. Iera la otto e meza e ierimo ancora là. La famiglia ga i sui tempi e bisogna rispetarli. El se rasegna poco dopo. No se ghe la pol far nianche per le dieci !! Marino se fa un spagnol per lui e un per Sandro. I va fora a fumar e a farse magnar dai musati. Tanto xe tempo !!

Riva el secondo. Anzi no. Prima una bela terina de verdura. La posa davanti de Plinio. “E per i altri?”

“No, no....quela xe per tutti”. 'Ca mare...ghe la faremo ?

Riva el secondo. Idem con patate. Se dividemo ste mega porzioni, tipo “nouvelle cousine” e adiritura vanza !!!! Barufa per finir la carne. Spirito altruistico pensando che i altri sta morindo de fame.

Intanto el merlo ghe fa la testa come un balòn a do de lori che soggiornava là, penso. No so se i tornarà !!!

Alla lunga, bisogna dir, ssssai lunga, xe passà tanto tempo che quasi no iera più fame.

Un bel toco de strucolo de pomi guarnì con fruti de bosco caldi. Bon. Nela media dei.

“Qualchedun vol caffè ?” Sì mi, anche mi. “Allora in tuto quanti caffè?”. “Quattro”.

Ghe caschemo sempre !!!

No xe per loriiii !!! Poche volte go assagià un cafè cusì brusà. L'odor iera una via de mezo tra la scamorza afumicata e la zenere dela stua. No se pol descriver. Lasà là tutto.

Femo i conti. Merlo comportite ben !

Venti pel trasporto, venticinque per la zena compreso el bever....... MA COME ? Se gavemo comprà soli de bever....

Bon ,bon dei, no me formalizo. Deme venti e semo acqua. Ecco...appunto. Quel te ne ga dà. Do broche de acqua de spina e do mezi de vin che ga rivà vanzar un poco...

No femo longhi, no iera el caso e nianche voia. El gaveva de portarne fin casa ,ancora. La giornada xe stada bela, bona la compagnia e l'allegria.

Disemo che semo stai dei signori. Come che se usa dir a Trieste....” Bon..pecà poco !!!”

Montemo in furgoneta e se femo menar fin là dei auti. La stanchezza se fa sentir e semo più silenziosi.

Scarighemo le bici dal cassòn e le carighemo in auto.

Fatta anche la “Parenzana”. Obiettivo raggiunto,

La giornada xe finida.

Bon muli...grazie per la compagnia e alla prossima......

(Rapportin a cura de Sandro)