Presnti Mi e Pinolo altri in ferie o lavori varii, Coco no pol sta mal... Rimettite presto Coco.
L'idea jera de far la ciclabile, el castellaro e n'dar verso Sesana, el sentiero Ressel verso Basovizza e casa. Bon ma xe caldo... andemo pian e dopo vedemo strada facendo... Andemo con andamento lento su per la ciclabile tra una ciacola e l'altra, ma a un certo punto all'altezza della partenza del sentiero 17 ne passa un mato con una 29 dalla pedalada allegra e bela tonda, guardo ben la bici, per zercarghe el motor elettrico (za una volta un voleva cazarmela), ma niente no jera...
Bu, restemo un poco mal mi e Pinolo, ma lo lasemo andar... el ciapa un 500 metri... ma Pino no riva farse una ragion... el scatta all'inseguimento, "ma Pinooo no dovevimo andar pian che xe caldo?" ghe zigo mi, ma ormai nol senti, e niente me meto a rioda e lo ciapemo ...fadiga e caldo... bon go dito lo gavemo ciapa resteremo drio... Ovvio! Logico! Ma te conossi Pino?
Lo passa... Ui ui ui ui digo dentro de mi ...fadiga e caldo...
Morale, el mato ne se taca drio e noi a tutta fin alla fine della ciclabile dove noi giremo per el Castellaro e lui va drito, menomal...
Squaiadi de fadiga e caldo ghe digo a Pino: "cio ma no jera meio starghe drio, dovevimo propio passarlo?" Pino: "pensavo che nol ne stava drio e a un certo punto go sperà che el ne passi, ma niente... casin".
Mi ancora desso penso che el gaveva la pedalada assistida, no pol esser... go batu i miei record su Strava, adesso son solo 999vesimo su segmento ciclabile..
Poco mal se fermemo a magnar la solita "enervit banana" prima de affrontar el Castellaro e ragionemo sul mato che n'dava forte e su noi che semo i soliti CilistiCisti. Ma se rifaremo de Danilo, la no ne bati nissun... a ma... desso che penso Danilo xe in ferie... ciò no, tutto contro.
Go leto in internette che dei muloni che va in bici (MIB - muli in bici) i va vizin Sesana in un agriturismo a magnar e bever e ghe digo a Pino se volemo andar a provar.
Pino: "ovvio ovvio n'demo n'demo"
Su per el Castellaro xe dura, e le imprecazioni no se conta, e la domanda ne nassi spontanea, ma no jera meio lassar andar quel mato con la 29 dopada?
Ma in mezzo ai alberi xe ombra e tutto nell'insieme passemo ben la salita e se fermemo sul laghetto in cima. Foto de rito... ghe ne gavero za un venti, ma xe cussi.
A sto punto pensemo che se andemo driti rivemo sulla strada che ne porta sul Cocusso, allora optemo per scender zo per un viottolo che, ne mi ne lui gavemo mai fatto, ma provemo a... no pol che portarne a Lokev... Cul... semo rivadi a Preloze poco sora Lokev, neanche mal dei. De qua fin Sesana no ne ga passa nissun "con una 29" quindi, gavemo fato quel che se gavevimo ripromesso, giretto pian e ben che xe caldo.
Rivadi a Sesana ciapemo per un paesetto che se ciama Dane e qua tutto ben per un pochi de km sul sterrato, fin a un certo punto che me sbaglio e rivemo in una dolina enorme con un pra vastissimo... bu... persi... e da qua in avanti per scriver tutto quel che xe sucesso me se voleria una risma de fogli a4, quindi vedè de partecipar alla prossima uscita, cussi no ve perdè niente. Ve digo solo che Pino el me le ga dite de tutti i colori, el me ga cancella dalla lista de amicizie de facebook, per diventar praticamente mio fradel, quando semo rivadi in agriturismo e i ne ga portà de bever.
E bon... verso la una, con fadiga e stanchezza se alzemo, saludemo commossi, e partimo verso casa. No so che temperatura jera a quell'ora, ma per el sentier Ressel fin a Basovizza no gavemo incontra nissun... ma nissun... pareva de star nel deserto con le bale de licheni che rodolava.
Cattinara rotonda nei pressi de Zazzeron mi e Pino se saludemo ogni dun per la strada de casa dandose appuntamento per la prossimma sgambata.
Passemo a robe serie:
El ristoro enogastronomico xe sta fato in agriturismo Bencic a Filipcje Brdo.
Posto veramente bel, gavemo solo chiesto se ne portava un piattin de parsuto... e de bever qualcossa de fresco... Xe riva... un piatto de parsutto, un de salame e sopressa, un de ricotta scottada sulla piastra, dei pomodori condidi con aceto balsamico e oio, e un paniere pien de pan brustoli sulla piastra. De bever una bucaleta de teran misiada con no so cosa, altre do robe che la me ga dito ma bu... no so... ma bon, sai sai bon.
Prosim, Mali racun ja... 18 juri totali!!! Da ripeter con famiglie al seguito.
(Rapportin a cura de Fabio)
Nessun commento:
Posta un commento