Giro LA PARENZANA 2016

Come l’altro anno, xe rivà el giorno della gita sociale del “FRIZANTEAM”. 10 intrepidi ciclisti alle prese con la clasica Parenzana. Con una novità.

Sicome el merlo de graia de l’altro anno no riva portar più de oto bici, tre di “loro” dormirà a Porec e tornarà indrio el giorno dopo de novo in bici. Scopriremo dopo chi xe i nostri eroi !!
O spanài, come che volè.

Alora….ritrovo clasico al parchegio del Brico ale sei e trequarti. Formazion composta da:

Tilio “capogita” nominado in futuro: granfo”

Furio alias “Coco”

Fabio “costoleta”

Pino…..xe Pino!

Mauri “Whitecief” o "Jas Gavroski"

Gianni “spider”………non per la velocità……

Massimo “Janu”

E tre Sandri: Sandro “cata”, Sandro “linea fissa” e Sandro “Italo”…

Ecco….questo xe el squadron in partenza quela matina.

Ultime messe a punto dei mezi, controlo atrezature, un do selfie de rito e se parti quasi… sai quasi, puntuali. Anzi no !! Anche una foto tuti insieme che ne fa una povera molie con do oci de sonno cusì, che ga portà el marì fin là in auto ! Santa dona….

Bon, partimo.

A Skofie, diese minuti dopo, semo za in bar de Tanja !!!! Ui ui ui ….comincemo ben.

Niente paura, cafè per tuti e se va avanti. Capodistria, Isola, Portorose riva presto. Qua ingrumemo una clapa de un trenta de lori in bici, omini e donne, che fa la nostra stessa strada. Solo che el più giovine gaveva settanta !!!!

Quatro colpi de pedal e li seminemo, logico, e se involemo verso el primo rifornimento de acqua a Siciole.

Rivemo ala spicciolata, uno, due, tre quatro; riva “spider” che sbaglia de molar el pedal e el va in tera come nei film western co i ghe copa el caval !!!

Rifornimento de acqua, e se aviemo verso el confin. Via lissi e puntemo verso Salvore. Un per de foto de rito con le saline sul sfondo e svolta verso Buie.

Altra sosta là dela ex stazion con foto e tachemo la “scalata” verso Grisignana.

Trovemo un fia de trafico autoctono e qua el gruppo se sgrana un poco: i più preparai stacca i più cisti. Ma no fa niente.

L’apuntamento xe in paese per la sosta merenda e rifornimento idrico. Prima de radler (una merda fata con bira e sprite) e dopo de acqua in te le borace.
Bisogna dir. Grisignana xe sempre bela e la conquista quei che no iera mai.

Se riparti verso Levade finalmente in discesa; te pol capir……19 chilometri con un dislivel de trecento metri. Risultato: te pedali tipo in salita! Rivemo quasi insieme.

Anche qua ne ciapa sai sede, cusì se femo un giro de birre in local. “Muli….cosa ve porto?” fa la baba del bar. No proprio cusì ma circa.“Ozujsko o Lasko?” Ozujsko che xe bona ah!

Tra do ciacole e un panin butemo zo le birre. Fabio se alza per pagar ma qualchedun lo ga precedù.

E alora el se presenta con una altro giro de pivo. Lasko stavolta perchè le Ozujsko fresche ghe le gavemo finide.

“Nooooo, mi no bevo dei! No rivo……” Qualchedun no ghe la fa e cusì se scopri le bevandele che buta zo la sua e anche una de quele vanzade.

Sede xe sede!!!! E po vardar in su verso Montona con le zate de legno no xe incoragiante per i meno alenai……

Ripartimo con l’obietivo de rivar a Visinada dove gavemo becà el trenin l’altro anno e ghe gavemo magna tutto el rebechin per i turisti a sbafo.

La salita anche se leggera fa selezion, come che i disi per tivù. Gianni fa fadiga e nanche a mi no me vanza. Po xe de tornar indrio el giorno dopo e xe de risparmiarse.

Bon, rivemo al ristoro e……delusion !!! No xe nisun. Solo el mus in tel recinto con do cavre e una che gira fora. Che pecà. Però xe una fontanela. Janu buta via l’acqua e va far el pien tuto contento. Finalmente acqua fresca! El se sta impignindo la boracia senza però notar el cartel de mezo metro quadrato con scrito sora in tre lingue: “ACQUA NON POTABILE”. No go tradotto eh! Iero scrito anche in italian.

“Caxxo……e adesso?” A secco fin Parenzo!!!

 E niente…..rimontemo in bici e via avanti fin la piera dei cento chilometri per la foto.

Mi viagiavo nele retrovie con Gianni e lo rassicuravo:” Te vedarà che co rivemo in paese a Visinada xe tutto discesa fin Parenzo”…..”Tien duro che dopo sarà meio”. El iera el meno alenà de tuti e el iera bastanza cusinà. Quasi a tutti cominciava a farghe mal el cul. Ormai iera più de sei ore che ierimo sentai su quei “divani”.

L’unico sempre in piena forma iera Coco. Sempre pimpante sui pedai e spesso in fuga per ciapar tempo e far filmati. Sto anno ciama antidoping per lui!!!!

Ragiungemo anche Visinada e se calemo verso Parenzo. Per le strade in mezo ai campi ghe digo: “come xe Gianni? Un poco meio adesso?” Col sguardo fisso per tera senza nanche guardarme, tuto quel che el me riva dir xe: “ vafanculo!!”. No servi dir altro.

El grupo xe guidà de Tilio che no vedi l’ora de rivar. El ritmo blando lo inervosisi.

Sta volta restemo indrio mi e Fabio. El sentier camina in mezo ai campi de vide e le xe piene de ùva.

Ne ciapa fame e se fermemo a magnar un do raspi. D’altra parte semo in gita no? E “sacco svodo no pedala!”

Li ragiungemo più avanti (per dir la verità i ne spetava) e ciapemo la zigada de Tilio.

“Ciò, ndemo vanti dei, che go i co.... pieni!!”

E cusì ripartimo e femo tuto un tiro fin la stazion de Parenzo.

 Mi, Fabio e Pino rivemo de un’altra strada perché volevimo veder dove che xe la casa do che dormiremo de notte.

Ebbene sì, semo noi tre che el giorno dopo tenteremo l’impresa de tornar in bici !! Ma come che diseva Lucarelli in “Blu notte”…..questa è un’altra storia….

La stazion xe vizin al mar e dopo le foto che documenta el ragiungimento dell’obietivo scata obligatorio el “tociòn”per rinfrescarse e rigenerarse un poco.

Per andar in acqua xe una meza merda. Pien de scoi afioranti che se no te sta atento te se verzi  la testa come niente. Serviva de più el casco per andar in acqua che per andar in bici!!

Pino trova un scoio a pel de acqua in mezo al mar e el se improvisa novello Cristo che camina sul’acqua “GesùbamPino”.

Femo el bagno come le vece in mezo ai scoi come se fosimo in vasca de bagno. Nanche no se vedi che xe tuti che pissa. Fora xe la docia per resentarse e xe quel che ne servi. Coco xe el primo, tanto per cambiar, soto la docia. El se remena do ore intorno quel pal che par che el fazi la “lap dance”.

Rinfrescadi, sugadi e cambiadi semo pronti per andar a magnar.

Puntemo verso una pizzeria che conosevo in centro a Parenzo. Iera un pochi de anni che non andavo. Chisà se la xe ancora.

La xe! Ma tacà xe un altro local che una volta no iera. “Balkan grill” scriveva sul cartelòn.

Al camerier col mio inglese fluente ghe fazo:”Fazè pizza?”

“Pizza?...no pizza!! Pizza mangiare in Italia. Italia buono per pizza. Qua mangiare carne. Qua buono per carne!!!

Massimo dopo se spiega meio con lui in inglese e i se capisi de più. Deciso! Se magna là.

Una bella tavolata per diese de lori e se ordina. Birra, vin e grigliata mista, anche con carni strane, per tutti. Prima però verdura. Perché fa ben. E pan….tanto pan. Te sa che mefa!!

Femo un brindisi per la bella gita e la bella compagnia e el camerier brinda con noi. Noi bireta o spritz, lui se scassa a petto una trapa!! Xe usanza cusì dale sue parti…..

Prima che rivi la carne, con un poco de pan e do foie de salata Gianni xe za incugnà. Ghe se bloca la digestion e el riva butar zo poco niente! Iera stanco fin el stomigo!

Mèmori dela zena là del merlo de l’altro anno, pregavimo che sto giro la ne vadi meio. E la xe andada sai meio. Bon e abbondante.
 

 

Un per de giri de pelinkovec e lo saludemo.

“No se lasaremo miga come cani, no?” ….tanto per cambiar…. “No ah!” E se ritrovemo in piazza in centro a bever un altro pelinkovec.

“Bon muli xe tardi, bisogna andar su dove che ne speta el merlo”.

Femo el tochetin de strada fin dove che el ne spetava. Legera salita che me pareva de far el Zoncolan !!!! Due gambe de legno degne de Pinocchio.

Là xe za el merlo che ne speta. El comincia carigar le bici. Ma ghe vol tempo. Combinazion vol che là tacà xe un bareto.

“E cosa andaremo via senza saludarse?” ……..”No ah!!”

Altro giro de pelinkovec, no tutti, e se monta in furgon. Tilio, Furio, Maury, Sandro cata, Sandro tranvier; Massimo e Gianni torna a casa. Sandro, Fabio e Pino resta.

Saluti con le lagrime con tanto de fazoleti bianchi sventoladi dai “eroi” e el furgon parti.

Grazie muli per la bella giornata. Una bella gita in bona compagnia.

Go avudo l’occasion de conoser de persona due novi membri del “Frizanteam”, Massimo e Sandro. Bravi e sai cocoli. Alla prossima……..

Ah….dimenticavo! Tanto per la cronaca. El merlo ga dovudo fermarse per strada e far smontar Tilio che ghe ga ciapà crampi. Xe un documento segreto che gira in rete che lo ritrai distirà per tera che l’impreca verso quel che filma inveze de zucarghe i polpaci !!!!!  Tilio “granfo”po!

                                                            

Alla prossima…..sì…….ma quei che resta?

Come che go dito prima……..”Questa è un’altra storia”……….

PS: sicuro i sarà andai driti a dormir………..

 (Rapportin a cura de Sandro "Italo")

A... dimenticavo...  qualchedun ga dito che el prossimo anno NO PARENZANA

PREFAZIONE

L'autor in questo scrito "spider" alla "jas gavroski" no trascura la "costoleta" ironica del grupo, tegnindo sempre una "linea fissa" senza "granfi" propia del "italo"pensiero che lo contradistingui, "cata"lizando el letor su un raconto dale "janu"nnziane esenze, fresche che sa de "coco" e de "pino" come un bon:
"FRIZANTEAM"

(Prefazion a cura de costoleta)